ਬਜਟ 2026 ਦੇ ਪੇਸ਼ ਹੋਣ ਮਗਰੋਂ ਸ਼ੇਅਰ ਮਾਰਕੀਟ ਵਿਚ ਹਾਹਾਕਾਰ ਮਚ ਗਿਆ ਹੈ ਅਤੇ ਵੱਡੀਆਂ ਕੰਪਨੀਆਂ ਦੇ ਸ਼ੇਅਰ ਤਾਸ਼ ਦੇ ਪੱਤਿਆਂ ਵਾਂਗ ਡਿੱਗ ਗਏ ਹਨ। ਬਜਟ ਪੇਸ਼ ਕਰਨ ਦੌਰਾਨ ਬੰਬੇ ਸਟਾਕ ਐਕਸਚੇਂਜ ਦਾ 30 ਸ਼ੇਅਰਾਂ ਵਾਲਾ ਸੈਂਸੈਕਸ ਅਚਾਨਕ ਕਰੈਸ਼ ਹੋ ਗਿਆ, ਜਦੋਂਕਿ ਨੈਸ਼ਨਲ ਸਟਾਕ ਐਕਸਚੇਂਜ ਵਿੱਚ ਵੀ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲੀ। ਬੀਐਸਈ ਸੈਂਸੈਕਸ ਇੱਕ ਝਟਕੇ ਵਿੱਚ 2300 ਅੰਕਾਂ ਤੋਂ ਵੱਧ ਡਿੱਗ ਗਿਆ, ਜਦੋਂਕਿ ਐਨਐਸਈ ਨਿਫਟੀ 750 ਅੰਕਾਂ ਤੱਕ ਡਿੱਗ ਗਿਆ। ਮਾਰਕੀਟ ਕਰੈਸ਼ ਕਾਰਨ ਰਿਲਾਇੰਸ, ਬੀਈਐਲ ਅਤੇ ਅਡਾਨੀ ਪੋਰਟਸ ਸਮੇਤ ਕਈ ਵੱਡੀਆਂ ਕੰਪਨੀਆਂ ਦੇ ਸ਼ੇਅਰਾਂ ਵਿੱਚ ਭਾਰੀ ਗਿਰਾਵਟ ਆਈ।
ਬਜਟ ਪੇਸ਼ ਕੀਤੇ ਜਾਣ ਤੋਂ ਪਹਿਲਾਂ ਬੀਐਸਈ ਸੈਂਸੈਕਸ 82,388.97 ‘ਤੇ ਖੁੱਲ੍ਹਿਆ, ਜੋਕਿ ਇਸਦੇ ਪਿਛਲੇ 82,269 ਦੇ ਬੰਦ ਹੋਣ ਤੋਂ ਵੱਧ ਸੀ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਦੇ ਸੰਸਦ ਵਿੱਚ ਬਜਟ ਭਾਸ਼ਣ ਦੌਰਾਨ ਇਹ ਉਤਾਰ-ਚੜ੍ਹਾਅ ਹੁੰਦਾ ਰਿਹਾ। ਬਜਟ ਦੇ ਅਖੀਰ ਵਿੱਚ ਸੈਂਸੈਕਸ ਅਚਾਨਕ 2,370 ਅੰਕ ਡਿੱਗ ਗਿਆ।
