‘ਮੋਦੀ ਨੂੰ 400 ਸੀਟਾਂ ਚਾਹੀਦੀਆਂ ਹਨ ਤਾਂ ਜੋ ਕਾਂਗਰਸ 370 ਵਾਪਸ ਨਾ ਲਿਆਵੇ, ਰਾਮ ਮੰਦਰ ‘ਤੇ ‘ਬਾਬਰੀ ਤਾਲਾ’ ਨਾ ਲਵੇ, ਪ੍ਰਧਾਨ ਮੰਤਰੀ ਨੇ ਧਾਰ ਵਿੱਚ ਕਿਹਾ
ਮੱਧ ਪ੍ਰਦੇਸ਼ ਦੇ ਧਾਰ ਵਿੱਚ ਇੱਕ ਚੋਣ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ ਪੀਐਮ ਮੋਦੀ ਨੇ ਕਾਂਗਰਸ ਉੱਤੇ ਡਾਕਟਰ ਬਾਬਾ ਸਾਹਿਬ ਅੰਬੇਡਕਰ ਦਾ ਅਪਮਾਨ ਕਰਨ ਦਾ ਇਲਜ਼ਾਮ ਲਗਾਇਆ। ਉਨ੍ਹਾਂ ਕਿਹਾ ਕਿ ਵਿਰੋਧੀ ਪਾਰਟੀ ਕਹਿਣ ਲੱਗੀ ਹੈ ਕਿ ਸੰਵਿਧਾਨ ਬਣਾਉਣ ਵਿੱਚ ਬਾਬਾ ਸਾਹਿਬ ਦੀ ਭੂਮਿਕਾ ਬਹੁਤ ਘੱਟ ਸੀ। ਨਾਲ ਹੀ ਕਿਹਾ ਕਿ ਮੈਂ ਲੋਕ ਸਭਾ ਚੋਣਾਂ ‘ਚ 400 ਸੀਟਾਂ ਜਿੱਤਣਾ ਚਾਹੁੰਦਾ ਹਾਂ ਤਾਂ ਜੋ ਕਾਂਗਰਸ ਅਯੁੱਧਿਆ ਦੇ ਰਾਮ ਮੰਦਰ ‘ਤੇ ‘ਬਾਬਰੀ ਦਾ ਤਾਲਾ’ ਨਾ ਲਗਾਵੇ।
ਮੋਦੀ ਨੇ ਕਿਹਾ, ਸੱਚਾਈ ਇਹ ਹੈ ਕਿ ਕਾਂਗਰਸ ਪਰਿਵਾਰ ਡਾਕਟਰ ਬਾਬਾ ਸਾਹਿਬ ਅੰਬੇਡਕਰ ਨੂੰ ਬਹੁਤ ਨਫ਼ਰਤ ਕਰਦਾ ਹੈ। ਇਸ ਨਫ਼ਰਤ ਵਿੱਚ ਹੁਣ ਕਾਂਗਰਸ ਨੇ ਇੱਕ ਹੋਰ ਚਾਲ ਚਲਾਈ ਹੈ। ਕਾਂਗਰਸ ਚਾਹੁੰਦੀ ਹੈ ਕਿ ਸੰਵਿਧਾਨ ਬਣਾਉਣ ਦਾ ਸਿਹਰਾ ਬਾਬਾ ਸਾਹਿਬ ਨੂੰ ਨਾ ਮਿਲੇ। ਕਾਂਗਰਸ ਕਹਿਣ ਲੱਗੀ ਹੈ ਕਿ ਸੰਵਿਧਾਨ ਬਣਾਉਣ ਵਿੱਚ ਬਾਬਾ ਸਾਹਿਬ ਦਾ ਯੋਗਦਾਨ ਘੱਟ ਸੀ, ਪਰ ਸੰਵਿਧਾਨ ਬਣਾਉਣ ਵਿੱਚ ਸਭ ਤੋਂ ਵੱਡੀ ਭੂਮਿਕਾ ਨਹਿਰੂ ਜੀ ਨੇ ਨਿਭਾਈ। ਇੰਨਾ ਹੀ ਨਹੀਂ ਕਾਂਗਰਸੀ ਲੋਕ ਨਵੀਂ ਅਫਵਾਹ ਫੈਲਾ ਰਹੇ ਹਨ ਕਿ ਜੇਕਰ ਮੋਦੀ ਨੂੰ 400 ਸੀਟਾਂ ਮਿਲ ਗਈਆਂ ਤਾਂ ਉਹ ਸੰਵਿਧਾਨ ਬਦਲ ਦੇਣਗੇ। ਇੰਝ ਜਾਪਦਾ ਹੈ ਜਿਵੇਂ ਕਾਂਗਰਸੀ ਲੋਕਾਂ ਦੀ ਅਕਲ ਨੂੰ ਵੋਟ ਬੈਂਕ ਨੇ ਤਾਲਾ ਲਾ ਦਿੱਤਾ ਹੋਵੇ। ਉਨ੍ਹਾਂ ਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ 2014 ਤੋਂ 2019 ਅਤੇ 2019 ਤੋਂ 2024 ਤੱਕ ਮੋਦੀ ਨੂੰ NDA ਅਤੇ NDA+ ਦੇ ਰੂਪ ‘ਚ 400 ਸੀਟਾਂ ਦਾ ਸਮਰਥਨ ਹਾਸਲ ਸੀ।
