ਲੁਧਿਆਣਾ, 22 ਨਵੰਬਰ : ਰਾਜ ਸਭਾ ਮੈਂਬਰ ਤੇ ਵਾਤਾਵਰਣ ਪ੍ਰੇਮੀ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਬੁੱਢੇ ਦਰਿਆ ਵਿੱਚ ਗੰਦੇ ਪਾਣੀ ਪੈਣ ਤੋਂ ਰੋਕਣ ਵਿੱਚ ਲਾਪ੍ਰਵਾਹੀ ਵਰਤ ਰਹੇ ਅਧਿਕਾਰੀਆਂ ਵਿਰੱੁਧ ਸਖ਼ਤ ਟਿੱਪਣੀਆਂ ਕੀਤੀਆਂ। ਉਨ੍ਹਾਂ ਕਿਹਾ ਕਿ ਜਿਲ੍ਹਾਂ ਲੁਧਿਆਣੇ ਦਾ ਪ੍ਰਸ਼ਾਸ਼ਨ ਏਨਾ ਢੀਠ ਹੋ ਚੁੱਕਾ ਹੈ ਕਿ ਉਹ ਲੋਕਾਂ ਨੂੰ ਗੰਦੇ ‘ਤੇ ਜ਼ਹਿਰੀਲੇ ਪਾਣੀਆਂ ਨਾਲ ਮਾਰਨ ‘ਤੇ ਤੁਲਿਆ ਹੋਇਆ ਹੈ। ਇਹ ਦੂਜਾ ਮੌਕਾ ਹੈ ਜਦੋਂ ਮੈਂਬਰ ਪਾਰਲੀਮੈਂਟ ਸੰਤ ਸੀਚੇਵਾਲ ਨੇ ਜਮਾਲਪੁਰ ਦੀ ਡਰੇਨ ‘ਤੇ ਜਾ ਕੇ ਸਿੱਧੇ ਤੌਰ ‘ਤੇ ਜਿਲ੍ਹਾਂ ਪ੍ਰਸ਼ਾਸ਼ਨ ਤੇ ਖ਼ਾਸ ਕਰਕੇ ਸੀਵਰੇਜ ਬੋਰਡ ਅਤੇ ਨਗਰ ਨਿਗਮ ਦੇ ਅਧਿਕਾਰੀਆਂ ‘ਤੇ ਨਿਸ਼ਾਨਾ ਸਾਧਿਆ। ਅੱਜ ਜਦੋਂ ਅਚਨਚੇਤ ਸੰਤ ਸੀਚੇਵਾਲ ਜਮਾਲਪੁਰ ਡਰੇਨ ‘ਤੇ ਲੱਗੇ ਪੰਪਿੰਗ ਸਟੇਸ਼ਨ ‘ਤੇ ਗਏ ਤਾਂ ਉਥੇ ਲੱਗੀਆਂ ਤਿੰਨ ਮੋਟਰਾਂ ਵਿੱਚੋਂ ਦੋ ਬੰਦ ਪਈਆਂ ਸਨ, ਸਿਰਫ਼ ਇੱਕ ਮੋਟਰ ਹੀ ਚੱਲ ਰਹੀ ਸੀ।
ਜ਼ਿਕਰਯੋਗ ਕਿ 7 ਨਵੰਬਰ ਨੂੰ ਬੁੱਢੇ ਦਰਿਆ ਦੀ ਸਫ਼ਾਈ ਬਾਬਤ ਸਮੀਖਿਆ ਮੀਟਿੰਗ ਤੋਂ ਤੁਰੰਤ ਬਾਅਦ ਜਮਾਲਪੁਰ ਡਰੇਨ ‘ਤੇ ਲੱਗੇ ਪੰਪਿੰਗ ਸਟੇਸ਼ਨ ‘ਤੇ ਸਾਰੀਆਂ ਮੋਟਰਾਂ ਬੰਦ ਹੋਣ ਤੋਂ ਸੰਤ ਸੀਚੇਵਾਲ ਅਧਿਕਾਰੀਆਂ ‘ਤੇ ਭੜਕ ਪਏ ਸਨ ਕਿਉਂਕਿ ਮੀਟਿੰਗ ਵਿੱਚ ਸੀਵਰੇਜ ਬੋਰਡ ਅਤੇ ਖਿਲਾੜੀ ਸੰਸਥਾ ਦੇ ਅਧਿਕਾਰੀਆਂ ਨੇ ਦਾਅਵਾ ਕੀਤਾ ਸੀ। ਪੰਪਿੰਗ ਸਟੇਸ਼ਨ ਦੀਆਂ ਸਾਰੀਆਂ ਮੋਟਰਾਂ ਚੱਲ ਰਹੀਆਂ ਹਨ। ਮੀਟਿੰਗ ਨੂੰ ਗੁੰਮਰਾਹ ਕਰਨ ਦਾ ਗੰਭੀਰ ਦੋਸ਼ ਲੱਗਾ ਸੀ। ਸੰਤ ਸੀਚੇਵਾਲ ਵੱਲੋਂ 7 ਨਵੰਬਰ ਨੂੰ ਗੰਦੇ ਪਾਣੀ ਬੁੱਢੇ ਦਰਿਆ ਵਿੱਚ ਜਾਣ ਦੀ ਵੀਡੀਓ ਸੰਤ ਸੀਚੇਵਾਲ ਨੇ ਪੰਜਾਬ ਦੇ ਰਾਜਪਾਲ ਅਤੇ ਮੁੱਖ ਮੰਤਰੀ ਪੰਜਾਬ ਨੂੰ ਭੇਜ ਦਿੱਤੀ ਸੀ।
ਪੰਪਿੰਗ ਸਟੇਸ਼ਨ ਦੀਆਂ ਦੋ ਮੋਟਰਾਂ ਚਲਾਉਣ ਦੀ ਜੁੰਮੇਵਾਰੀਆਂ ਸੀਵਰੇਜ ਬੋਰਡ ਅਤੇ ਖਿਲਾੜੀ ਸੰਸਥਾ ਦੇ ਅਧਿਕਾਰੀਆਂ ਦੀ ਤੈਅ ਕੀਤੀ ਹੋਈ ਹੈ। ਅੱਜ ਮੁੜ ਦੋ ਮੋਟਰਾਂ ਬੰਦ ਹੋਣ ਕਾਰਨ ਸੰਤ ਸੀਚੇਵਾਲ ਨੇ ਸੀਵਰੇਜ ਬੋਰਡ ਦੇ ਚੇਅਰਮੈਨ ਸੰਨੀ ਆਹਲੂਵਾਲੀਆਂ ਨਾਲ ਫੋਨ ਤੇੇ ਗੱਲਬਾਤ ਕਰਦਿਆ ਬੋਰਡ ਦੇ ਅਧਿਕਾਰੀਆਂ ਵੱਲੋਂ ਪੰਜਾਬ ਸਰਕਾਰ ਨੂੰ ਬਦਨਾਮ ਕਰਨ ਦੀ ਨੀਅਤ ਦਾ ਖੁਲਾਸਾ ਕੀਤਾ ਕਿ ਕਿਵੇਂ ਸਰਕਾਰ ਵੱਲੋਂ 650 ਕਰੋੜ ਰੁਪਏ ਖਰਚ ਕਰਕੇ ਟਰੀਟਮੈਂਟ ਪਲਾਂਟ ਬਣਾਏ ਗਏ ਹਨ ਪਰ ਫਿਰ ਵੀ ਗੰਦਾ ਪਾਣੀ ਸਿੱਧੇ ਤੌਰ ‘ਤੇ ਦਰਿਆ ਵਿੱਚ ਜਾ ਰਿਹਾ ਹੈ। ਇਸ ਗੰਭੀਰ ਮਾਮਲੇ ਨੂੰ ਸਥਾਨਕ ਸਰਕਾਰਾਂ ਵਿਭਾਗ ਦੀ ਸੀਨੀਅਰ ਅਧਿਕਾਰੀ ਆਈਏਐਸ ਦੀਪਤੀ ਉਪਲ ਦੇ ਧਿਆਨ ਵਿੱਚ ਵੀ ਲਿਆਂਦਾ ਗਿਆ।
ਸੰਤ ਸੀਚੇਵਾਲ ਨੇ ਗੱਲਬਾਤ ਦੌਰਾਨ ਸਪੱਸ਼ਟ ਕੀਤਾ ਕਿ ਬੁੱਢੇ ਦਰਿਆ ਨੂੰ ਪਲੀਤ ਕਰਨ ਲਈ ਜੁੰਮੇਵਾਰ ਕਿਸੇ ਵੀ ਅਧਿਕਾਰੀ ਨੂੰ ਬਖਸ਼ਿਆ ਨਹੀਂ ਜਾਵੇਗਾ। ਉਨ੍ਹਾਂ ਜਿਲ੍ਹਾ ਪ੍ਰਸ਼ਾਸ਼ਨ ਦੇ ਅਧਿਕਾਰੀਆਂ ਨੂੰ ਅੱਵਲ ਦਰਜੇ ਦੇ ਢੀਠ ਦੱਸਦਿਆ ਕਿਹਾ ਕਿ ਉਨ੍ਹਾਂ ਦੇ ਮਨਾਂ ਵਿੱਚ ਬਿਲਕੁਲ ਵੀ ਦਰਦ ਨਹੀਂ ਹੈ ਕਿ ਇਹ ਪਾਣੀ ਲੋਕ ਪੀ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਸਤਲੁਜ ਦਰਿਆ ਦਾ ਪਾਣੀ ਨਹਿਰਾਂ ਰਾਹੀ ਮਾਲਵਾ ‘ਤੇ ਰਾਜਸਥਾਨ ਨੂੰ ਜਾ ਰਿਹਾ ਹੈ ਤੇ ਲੋਕ ਇਸ ਨੂੰ ਪੀਣ ਲਈ ਵਰਤਦੇ ਹਨ।
ਬਾਕਸ ਆਈਟਿਮ
ਤਾਜਪੁਰ ਡੇਅਰੀਆਂ ਦਾ ਗੋਹਾ ਤੇ ਮਲਮੂਤਰ ਨੂੰ ਟਰੀਟ ਕਰਨ ਲਈ ਬਣਾਏ ਆਰਜ਼ੀ ਪ੍ਰਬੰਧ ਵੀ ਨਗਰ ਨਿਗਮ ਦੀ ਲਾਪ੍ਰਵਾਹੀ ਦਾ ਸ਼ਿਕਾਰ ਹੋ ਰਿਹਾ ਹੈ। ਧਰਮਕੰਡਾ ਨੇੜੇ ਆਰਜ਼ੀ ਤੌਰ ‘ਤੇ ਬਣਾਏ ਗਏ ਸੀਚੇਵਾਲ ਮਾਡਲ ਰਾਹੀ ਡੇਅਰੀਆਂ ਵਿੱਚੋਂ ਆ ਰਹੇ ਮੂਤਰਾਲ ਨੂੰ ਦੇਸੀ ਢੰਗ ਨਾਲ ਟਰੀਟ ਕੀਤਾ ਜਾ ਰਿਹਾ ਹੈ ਤੇ ਨਿੱਤਰਿਆ ਪਾਣੀ ਬੁੱਢੇ ਦਰਿਆ ਵਿੱਚ ਜਾ ਰਿਹਾ ਹੈ ਪਰ ਇੰਨ੍ਹਾਂ ਤਿੰਨਾਂ ਟੋਇਆ ਵਿੱਚ ਗੋਹਾ ਵੱਡੇ ਪੱਧਰ ‘ਤੇ ਆਉਣ ਕਾਰਨ ਇਸ ਵਿਚ ਬਣੀਆਂ ਦੋ ਕੱਚੀਆਂ ਕੰਧਾਂ ਢਹਿ ਜਾਣ ਕਾਰਨ ਪਸ਼ੂਆਂ ਦਾ ਮੂਤਰਾਲ ਸਿੱਧਾ ਹੀ ਦਰਿਆ ਵਿੱਚ ਜਾ ਰਿਹਾ ਹੈ। ਨਗਰ ਨਿਗਮ ਦੇ ਮੁਲਜ਼ਮਾਂ ਨੂੰ ਇੰਨ੍ਹਾਂ ਕੱਚੀਆਂ ਕੰਧਾਂ ਦੀ ਥਾਂ ਮਿੱਟੀ ਦੇ ਬੋਰ ਭਰਕੇ ਲਾਉਣ ਦੀਆਂ ਹਦਾਇਤਾਂ ਕੀਤੀਆਂ ਸਨ ਜਿਸ ‘ਤੇ ਉਨ੍ਹਾਂ ਨੇ ਅਮਲ ਨਹੀਂ ਕੀਤਾ।
