ਲੁਧਿਆਣਾ ਦੇ ਡਾਇਰੈਕਟੋਰੇਟ ਜਨਰਲ ਆਫ਼ ਜੀਐਸਟੀ ਇੰਟੈਲੀਜੈਂਸ (ਡੀਜੀਜੀਆਈ) ਦੇ ਜ਼ੋਨਲ ਦਫ਼ਤਰ ਨੇ ਜਾਅਲੀ ਬਿਲਿੰਗ ਕਰਨ ਵਾਲਿਆਂ ਖ਼ਿਲਾਫ਼ ਵੱਡੀ ਕਾਰਵਾਈ ਕੀਤੀ ਹੈ। ਇਸ ਮਾਮਲੇ ਵਿੱਚ ਮਾਸਟਰਮਾਈਂਡ ਸਤਵੀਰ ਸਿੰਘ ਸੇਖੋਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜਿਸ ਨੇ ਆਪਣੀਆਂ ਮੈਨੇਜਮੈਂਟ ਫਰਮਾਂ ਮੈਸਰਜ਼ ਬਟਾਲਾ ਮੈਟਲ ਇੰਡਸਟਰੀਜ਼, ਐੱਚ.ਐੱਸ. ਸਟੀਲ ਇੰਡਸਟਰੀਜ਼ ਅਤੇ ਸਿਟੀਜ਼ਨ ਇੰਡਸਟਰੀਜ਼ ਰਾਹੀਂ 200.05 ਕਰੋੜ ਰੁਪਏ ਦੀ ਜਾਅਲੀ ਬਿਲਿੰਗ ਕੀਤੀ ਅਤੇ ਫਿਰ ਮਾਲ ਨਾ ਭੇਜੇ 30.52 ਕਰੋੜ ਰੁਪਏ ਦਾ ਰਿਫੰਡ ਹਾਸਲ ਕੀਤਾ। ਮੈਸਰਜ਼ ਬਟਾਲਾ ਮੈਟਲ ਇੰਡਸਟਰੀਜ਼ ਨੇ MS ਸਕ੍ਰੈਪ, ਐਚਆਰ ਕੋਇਲ ਅਤੇ ERW ਪਾਈਪ ਦਾ ਵਪਾਰ ਅਤੇ ਨਿਰਮਾਣ ਕਰਨ ਵਾਲੀ ਕੰਪਨੀ ਹੋਣ ਦਾ ਦਿਖਾਵਾ ਕੀਤਾ।
ਪਤਨੀ ਅਤੇ ਡਰਾਈਵਰ ਦੇ ਨਾਂ ‘ਤੇ ਖੋਲ੍ਹੀਆਂ ਦੋ ਫਰਮਾਂ
ਤਲਾਸ਼ੀ ਮੁਹਿੰਮ ਦੌਰਾਨ ਸਤਵੀਰ ਸਿੰਘ ਸੇਖੋਂ ਦੇ ਰਿਹਾਇਸ਼ੀ ਅਤੇ ਸਰਕਾਰੀ ਅਹਾਤੇ ਤੋਂ 1 ਸੀਪੀਯੂ ਅਤੇ ਹੋਰ ਅਪਰਾਧਕ ਦਸਤਾਵੇਜ਼ ਜਿਵੇਂ ਚਲਾਨ, ਚੈੱਕ ਬੁੱਕ ਅਤੇ ਵੱਖ-ਵੱਖ ਖਾਤਿਆਂ ਦੀਆਂ ਪਾਸਬੁੱਕਾਂ ਅਤੇ ਡਾਇਰੀਆਂ ਆਦਿ ਜ਼ਬਤ ਕੀਤੇ ਗਏ ਹਨ। ਉਹ ਇਕ ਫਰਮ ਵਿਚ ਹਿੱਸੇਦਾਰ ਸੀ ਅਤੇ ਆਪਣੀ ਪਤਨੀ ਅਤੇ ਡਰਾਈਵਰ ਦੇ ਨਾਂ ‘ਤੇ ਹੋਰ ਦੋ ਫਰਮਾਂ ਚਲਾ ਰਿਹਾ ਸੀ।
ਇਸ ਤਰ੍ਹਾਂ, ਮਾਸਟਰਮਾਈਂਡ ਵਜੋਂ, ਉਸਨੇ ਸੀਜੀਐਸਟੀ ਐਕਟ, 2017 ਦੀਆਂ ਵਿਵਸਥਾਵਾਂ ਦੀ ਉਲੰਘਣਾ ਕਰਦੇ ਹੋਏ 200.05 ਕਰੋੜ ਰੁਪਏ ਦੀ ਜਾਅਲੀ ਬਿਲਿੰਗ ਰਾਹੀਂ ਮਾਲ ਦੀ ਡਿਲੀਵਰੀ ਕੀਤੇ ਬਿਨਾਂ ਲਗਭਗ 30.52 ਕਰੋੜ ਰੁਪਏ ਦੀ ਰਿਫੰਡ ਦੀ ਧੋਖਾਧੜੀ ਕੀਤੀ ਹੈ। ਸਤਵੀਰ ਸਿੰਘ ਸੇਖੋਂ ਨੂੰ ਗ੍ਰਿਫਤਾਰ ਕਰਕੇ ਜੁਡੀਸ਼ੀਅਲ ਰਿਮਾਂਡ ‘ਤੇ ਭੇਜ ਦਿੱਤਾ ਗਿਆ ਹੈ।
ਡੀਜੀਜੀਆਈ ਨਕਲੀ ਸੰਸਥਾਵਾਂ ਦੀ ਕਰ ਰਿਹਾ ਹੈ ਪਛਾਣ
ਡੀ.ਜੀ.ਜੀ.ਆਈ. ਲੁਧਿਆਣਾ ਅਜਿਹੀਆਂ ਨਕਲੀ ਸੰਸਥਾਵਾਂ ਦੀ ਸ਼ਨਾਖਤ ਕਰ ਰਿਹਾ ਹੈ ਅਤੇ ਉਨ੍ਹਾਂ ‘ਤੇ ਧਿਆਨ ਕੇਂਦਰਿਤ ਕਰ ਰਿਹਾ ਹੈ ਜੋ ਜਾਅਲੀ ਬਿਲਿੰਗ ਦੀ ਧੋਖਾਧੜੀ ਵਾਲੀ ਗਤੀਵਿਧੀ ਵਿੱਚ ਸ਼ਾਮਲ ਹਨ। ਏਜੰਸੀ ਨੇ ਲੋਕਾਂ ਨੂੰ ਇਹ ਵੀ ਅਪੀਲ ਕੀਤੀ ਹੈ ਕਿ ਉਹ ਕਿਸੇ ਵੀ ਕਿਸਮ ਦੀ ਟੈਕਸ ਚੋਰੀ/ਧੋਖਾਧੜੀ ਬਾਰੇ ਆਪਣੇ ਦਫ਼ਤਰ ਨੂੰ ਈਮੇਲ (DGGSTI.LDZU@GOV.IN), ਲੈਂਡਲਾਈਨ (0161-2453892) ਅਤੇ ਅਧਿਕਾਰਤ ਪਤੇ (51-ਡੀ, ਸਰਾਭਾ ਨਗਰ, ਲੁਧਿਆਣਾ-) ਰਾਹੀਂ ਰਿਪੋਰਟ ਕਰਨ।
