ਸਾਵਧਾਨ: ਮੋਬਾਇਲ ‘ਤੇ ਇਸ ਤਰੀਕੇ ਵੀ ਵੱਜ ਜਾਂਦੀ ਹੈ ਠੱਗੀ, ਠੱਗਾਂ ਨੇ ਲੱਭਿਆ ਨਵਾਂ ਪੈਂਤੜਾ !

ਲੁਧਿਆਣਾ, 6 ਅਗਸਤ : ਖੰਨਾ ‘ਚ ਪੰਜਾਬ ਨੈਸ਼ਨਲ ਬੈਂਕ ਦੇ ਸੇਵਾਮੁਕਤ ਮੈਨੇਜਰ ਨਾਲ ਸਾਈਬਰ ਠੱਗੀ ਦਾ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਨੂੰ ਸੁਣ ਤੁਹਾਡੇ ਵੀ ਪੈਰਾਂ ਹੇਠੋ ਜ਼ਮੀਨ ਖਿਸਕ ਜਾਵੇਗੀ। ਸਾਈਬਰ ਠੱਗਾਂ ਨੇ ਗੱਲ ਕਰਦੇ ਹੋਏ ਸੇਵਾਮੁਕਤ ਮੈਨੇਜਰ ਨੂੰ ਇਸ ਹੱਦ ਤੱਕ ਆਪਣੇ ਜਾਲ ਵਿੱਚ ਫਸਾਇਆ ਕਿ ਜੋ ਉਹ ਕਹਿੰਦੇ ਗਏ ਉਹ ਗੱਲ ਮੰਨੀ ਗਿਆ ਅਤੇ ਜਦੋਂ ਤੱਕ ਉਸ ਨੂੰ ਪਤਾ ਲੱਗਾ ਕਿ ਉਹ ਕਿਸੇ ਗਿਰੋਹ ਦੇ ਜਾਲ ਵਿੱਚ ਫਸ ਗਏ ਹਨ, ਤਦ ਤੱਕ ਠੱਗਾਂ ਨੇ 10 ਲੱਖ ਰੁਪਏ ਟਰਾਂਸਫਰ ਕਰ ਲਏ ਸਨ। ਜਦੋਂ ਤੱਕ ਸ਼ਿਕਾਇਤ ਸਾਈਬਰ ਸੈੱਲ ਤੱਕ ਪਹੁੰਚੀ, ਉਦੋਂ ਤੱਕ ਠੱਗ ਵੱਖ-ਵੱਖ ਤਰੀਕਿਆਂ ਨਾਲ ਇਹ ਰਕਮ ਕਢਵਾਉਣ ਵਿੱਚ ਕਾਮਯਾਬ ਹੋ ਚੁੱਕੇ ਸਨ। ਫਿਲਹਾਲ ਪੀੜਤ ਮੈਨੇਜਰ ਦੀ ਤਰਫੋਂ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ।
ਖੰਨਾ ਸਾਈਬਰ ਸੈੱਲ ਇਸ ਦੀ ਜਾਂਚ ਕਰ ਰਿਹਾ ਹੈ। ਕ੍ਰਿਸ਼ਨਾ ਨਗਰ ਦੇ ਰਹਿਣ ਵਾਲੇ ਭੁਪਿੰਦਰ ਕੁਮਾਰ ਵਿੱਜ ਨੇ ਦੱਸਿਆ ਕਿ ਉਹ ਪੰਜਾਬ ਨੈਸ਼ਨਲ ਬੈਂਕ ਤੋਂ ਬਤੌਰ ਮੈਨੇਜਰ ਸੇਵਾਮੁਕਤ ਹੋਇਆ ਹੈ। 3 ਅਗਸਤ ਦੀ ਸ਼ਾਮ ਨੂੰ ਉਹ ਘਰ ਬੈਠਾ ਆਪਣਾ ਮੋਬਾਈਲ ਦੇਖ ਰਿਹਾ ਸੀ। ਫੇਸਬੁੱਕ ‘ਤੇ ਕ੍ਰੈਡਿਟ ਕਾਰਡ ਬਣਾਉਣ ਦਾ ਲਿੰਕ ਆਇਆ। ਜਿਸ ਨੂੰ ਉਸਨੇ ਕਲਿੱਕ ਕੀਤਾ। ਇਸ ‘ਤੇ ਕਲਿੱਕ ਕਰਦੇ ਹੀ ਉਸ ਨੂੰ ਵਟਸਐਪ ‘ਤੇ ਕਾਲ ਆਈ। ਫੋਨ ਕਰਨ ਵਾਲੇ ਨੇ ਕਿਹਾ ਕਿ ਉਹ ਮੁੱਖ ਦਫਤਰ ਤੋਂ ਫੋਨ ਕਰ ਰਿਹਾ ਹੈ। ਤੁਸੀਂ ਸੈਟਿੰਗ ਬਦਲੋ।
ਜਦੋਂ WhatsApp ‘ਤੇ ਲਿੰਕ ‘ਤੇ ਕਲਿੱਕ ਕੀਤਾ ਗਿਆ ਤਾਂ ਮੋਬਾਈਲ ਦੀ ਸਕਰੀਨ ਸ਼ੇਅਰ ਹੋ ਗਈ। ਫੋਨ ਕਰਨ ਵਾਲੇ ਨੇ ਉਨ੍ਹਾਂ ਨੂੰ ਗੱਲਬਾਤ ਵਿੱਚ ਰੁੱਝਿਆ ਰੱਖਿਆ। ਹਾਲਾਂਕਿ ਇਸ ਦੌਰਾਨ ਉਸ ਨੂੰ ਅਹਿਸਾਸ ਹੋਇਆ ਕਿ ਆਨਲਾਈਨ ਧੋਖਾਧੜੀ ਹੋ ਰਹੀ ਹੈ। ਉਸਨੇ ਆਪਣੇ ਇੱਕ ਖਾਤੇ ਤੋਂ ਦੂਜੇ ਖਾਤੇ ਵਿੱਚ 1 ਲੱਖ ਰੁਪਏ ਟਰਾਂਸਫਰ ਕੀਤੇ। ਇਸ ਦੌਰਾਨ ਮੋਬਾਈਲ ਬੈਂਕਿੰਗ ਰਾਹੀਂ ਖਾਤੇ ਫ੍ਰੀਜ਼ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਪਰ ਡਿਸੇਬਲ ਆਪਸ਼ਨ ਆਉਂਦਾ ਰਿਹਾ। ਕਿਉਂਕਿ, ਠੱਗ ਨੇ ਪਹਿਲਾਂ ਹੀ ਮੋਬਾਈਲ ਸਕ੍ਰੀਨ ਸ਼ੇਅਰਿੰਗ ਦੀ ਸੈਟਿੰਗ ਬਦਲ ਦਿੱਤੀ ਸੀ। ਕਰੀਬ ਪੌਣੇ ਘੰਟੇ ਦੇ ਅੰਦਰ ਉਸ ਦੇ ਖਾਤੇ ਵਿੱਚੋਂ 10 ਲੱਖ ਰੁਪਏ ਟਰਾਂਸਫਰ ਹੋ ਗਏ।
ਸਾਈਬਰ ਸੈੱਲ ਦੇ ਇੰਚਾਰਜ ਇੰਸਪੈਕਟਰ ਵਿਨੋਦ ਕੁਮਾਰ ਨੇ ਦੱਸਿਆ ਕਿ ਜਿਵੇਂ ਹੀ ਭੁਪਿੰਦਰ ਕੁਮਾਰ ਵਿਜ ਸ਼ਿਕਾਇਤ ਲੈ ਕੇ ਉਨ੍ਹਾਂ ਕੋਲ ਆਇਆ ਤਾਂ ਉਨ੍ਹਾਂ ਨੇ ਪੂਰੇ ਨੈੱਟਵਰਕ ਦੀ ਤਲਾਸ਼ੀ ਲਈ। ਜਿਨ੍ਹਾਂ ਬੈਂਕ ਖਾਤਿਆਂ ਵਿੱਚ ਪੈਸੇ ਟਰਾਂਸਫਰ ਕੀਤੇ ਗਏ ਸਨ ਅਤੇ ATM ਤੋਂ ਕਢਵਾਏ ਗਏ ਸਨ। ਕੁਝ ਲੈਣ-ਦੇਣ ਹੋਏ, ਉਹ ਸਾਰੇ ਕਰਨਾਟਕ ਨਾਲ ਸਬੰਧਤ ਹਨ। ਇੱਕ ਖਾਤੇ ਵਿੱਚ 95 ਹਜ਼ਾਰ ਰੁਪਏ ਰਹਿ ਗਏ ਸਨ, ਜਿਸ ਨੂੰ ਬੈਂਕ ਨੇ ਰੋਕ ਦਿੱਤਾ ਹੈ ਅਤੇ ਖਾਤਾ ਫ੍ਰੀਜ਼ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਦੀ ਟੀਮ ਬਾਰੀਕੀ ਨਾਲ ਜਾਂਚ ਕਰ ਰਹੀ ਹੈ। ਸੀਨੀਅਰ ਅਧਿਕਾਰੀਆਂ ਨਾਲ ਗੱਲਬਾਤ ਕਰਕੇ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।