ਫ਼ਿਰੋਜ਼ਪੁਰ ਦੇ ਇਸ ਪਿੰਡ ‘ਚ ਰਿਹਾ ਰੋਮਾਂਚਕ ਮੁਕਾਬਲਾ, ਪੁੱਤ ਨੂੰ ਹਰਾ ਕੇ ਮਾਂ ਬਣੀ ਸਰਪੰਚ !

ਪੰਜਾਬ ਦੀਆਂ 9,398 ਪੰਚਾਇਤਾਂ ਵਿੱਚ ਸਰਪੰਚ ਲਈ ਮੰਗਲਵਾਰ ਨੂੰ ਵੋਟਾਂ ਪਈਆਂ ਅਤੇ ਦੇਰ ਸ਼ਾਮ ਚੋਣਾਂ ਦੇ ਨਤੀਜੇ ਐਲਾਨ ਦਿੱਤੇ ਗਏ। ਫ਼ਿਰੋਜ਼ਪੁਰ ਵਿੱਚ ਚੋਣਾਂ ਦੇ ਰੋਮਾਂਚਕ ਨਤੀਜੇ ਆਏ ਹਨ। ਇੱਥੇ ਇੱਕ ਪੰਚਾਇਤ ਵਿੱਚ ਸਰਪੰਚ ਦੇ ਅਹੁਦੇ ਲਈ ਮਾਂ-ਪੁੱਤ ਵਿਚਾਲੇ ਸਖ਼ਤ ਮੁਕਾਬਲਾ ਦੇਖਣ ਨੂੰ ਮਿਲਿਆ। ਹਾਲਾਂਕਿ ਇਸ ਰੋਮਾਂਚਕ ਮੁਕਾਬਲੇ ਵਿੱਚ ਪੁੱਤਰ ਹਾਰ ਗਿਆ ਅਤੇ ਮਾਂ ਸਰਪੰਚ ਦੇ ਅਹੁਦੇ ਲਈ ਚੋਣ ਜਿੱਤ ਗਈ। ਮਾਤਾ ਸੁਮਿੱਤਰਾ ਬਾਈ ਨੇ ਕੁਲ 24 ਵੋਟਾਂ ਨਾਲ ਸਰਪੰਚ ਦੀ ਚੋਣ ਜਿੱਤੀ। ਜਦੋਂਕਿ ਉਨ੍ਹਾਂ ਦੇ ਪੁੱਤਰ ਬੋਹੜ ਸਿੰਘ ਨੂੰ ਚੋਣਾਂ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਫ਼ਿਰੋਜ਼ਪੁਰ ਦੇ ਪਿੰਡ ਕੋਠੇ ਕਿਲੀ ਵਿੱਚ ਸਰਪੰਚ ਦੀ ਚੋਣ ਵਿੱਚ ਮਾਂ ਨੇ ਆਪਣੇ ਪੁੱਤਰ ਨੂੰ 24 ਵੋਟਾਂ ਨਾਲ ਹਰਾਇਆ। ਸਰਪੰਚ ਉਮੀਦਵਾਰ ਸੁਮਿੱਤਰਾ ਬਾਈ ਨੇ ਦੱਸਿਆ ਕਿ ਉਨ੍ਹਾਂ ਦੇ ਵੱਡੇ ਪੁੱਤਰ ਨੇ ਸਰਪੰਚ ਦੇ ਅਹੁਦੇ ਲਈ ਨਾਮਜ਼ਦਗੀ ਦਾਖ਼ਲ ਕੀਤੀ ਸੀ। ਉਨ੍ਹਾਂ ਦਾ ਪੁੱਤਰ ਚੋਣ ਲੜ ਰਿਹਾ ਸੀ। ਸੁਮਿੱਤਰਾ ਬਾਈ ਨੇ ਆਪਣੇ ਬੇਟੇ ਲਈ ਰਿਕਵਰੀ ਉਮੀਦਵਾਰ ਵਜੋਂ ਨਾਮਜ਼ਦਗੀ ਦਾਖ਼ਲ ਕੀਤੀ ਸੀ। ਵੱਡੇ ਪੁੱਤਰ ਦੀ ਨਾਮਜ਼ਦਗੀ ਰੱਦ ਕਰ ਦਿੱਤੀ ਗਈ ਸੀ। ਇਸੇ ਕਾਰਨ ਸੁਮਿੱਤਰਾ ਬਾਈ ਨੂੰ ਸਰਪੰਚ ਦੇ ਅਹੁਦੇ ਲਈ ਉਮੀਦਵਾਰ ਬਣਾਇਆ ਗਿਆ।
ਸਰਪੰਚ ਬਣਨ ਤੋਂ ਬਾਅਦ ਸੁਮਿੱਤਰਾ ਬਾਈ ਨੇ ਕਿਹਾ ਕਿ ਪਿੰਡ ਦੇ ਲੋਕਾਂ ਨੇ ਉਸ ਨੂੰ ਇਹ ਚੋਣ ਜਿਤਾਈ ਹੈ। ਕਿਉਂਕਿ ਉਸ ਦਾ ਵੱਡਾ ਪੁੱਤਰ ਚੋਣ ਲੜ ਰਿਹਾ ਸੀ ਪਰ ਉਸ ਦੀ ਨਾਮਜ਼ਦਗੀ ਰੱਦ ਹੋਣ ਕਾਰਨ ਸੁਮਿੱਤਰਾ ਬਾਈ ਉਮੀਦਵਾਰ ਬਣ ਗਈ। ਇਸ ਦੇ ਨਾਲ ਹੀ ਛੋਟਾ ਪੁੱਤਰ ਬੋਹੜ ਸਿੰਘ ਉਸ ਦੇ ਨਾਲ ਨਹੀਂ ਰਹਿੰਦਾ, ਇਸੇ ਰੰਜਿਸ਼ ਕਾਰਨ ਉਸ ਨੇ ਸਰਪੰਚ ਦੇ ਅਹੁਦੇ ਲਈ ਆਪਣੇ ਆਪ ਨੂੰ ਉਮੀਦਵਾਰ ਬਣਾਇਆ ਸੀ। ਪਰ ਪਿੰਡ ਦੇ ਲੋਕਾਂ ਨੇ ਸੁਮਿੱਤਰਾ ਬਾਈ ‘ਤੇ ਭਰੋਸਾ ਜਤਾਉਂਦਿਆਂ ਉਸ ਨੂੰ ਸਰਪੰਚ ਦੇ ਅਹੁਦੇ ‘ਤੇ ਜਿਤਾ ਦਿੱਤਾ।