ਪੰਜਾਬ ਦੇ ਜਲੰਧਰ ‘ਚ ਨਾਗਰਾ ਰੇਲਵੇ ਕਰਾਸਿੰਗ ਨੇੜੇ ਅੱਜ (ਸ਼ਨੀਵਾਰ) ਸਵੇਰੇ ਵੱਡਾ ਹਾਦਸਾ ਹੋਣੋਂ ਟਲ ਗਿਆ। ਨਾਗਰਾ ਰੇਲਵੇ ਫਾਟਕ ’ਤੇ ਤਾਇਨਾਤ ਗੇਟਮੈਨ ਰੇਲਗੱਡੀ ਦੇ ਆਉਣ ਤੋਂ ਪਹਿਲਾਂ ਫਾਟਕ ਬੰਦ ਨਹੀਂ ਕਰ ਸਕਿਆ। ਖੁਸ਼ਕਿਸਮਤੀ ਦੀ ਗੱਲ ਇਹ ਰਹੀ ਕਿ ਇਹ ਸਾਰੀ ਘਟਨਾ ਕਿਸੇ ਰਾਹਗੀਰ ਨੇ ਦੇਖੀ। ਜਿਸ ਤੋਂ ਬਾਅਦ ਉਨ੍ਹਾਂ ਤੁਰੰਤ ਦੋਵਾਂ ਪਾਸਿਆਂ ਤੋਂ ਆਵਾਜਾਈ ਰੋਕ ਦਿੱਤੀ ਅਤੇ ਵੱਡਾ ਹਾਦਸਾ ਹੋਣ ਤੋਂ ਬਚਾਅ ਲਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਕਤ ਰੇਲਵੇ ਕਰਾਸਿੰਗ ਤੋਂ ਕਈ ਸਬਜ਼ੀ ਵਿਕਰੇਤਾ ਲੰਘਦੇ ਹਨ।
ਜਦੋਂ ਟਰੇਨ ਆਈ ਤਾਂ ਗੇਟਮੈਨ ਸੁੱਤਾ ਪਿਆ ਸੀ
ਦੱਸ ਦੇਈਏ ਕਿ ਇਹ ਘਟਨਾ ਅੱਜ ਸਵੇਰੇ ਕਰੀਬ ਪੰਜ ਵਜੇ ਵਾਪਰੀ। ਦੋਵਾਂ ਪਾਸਿਆਂ ਤੋਂ ਆਵਾਜਾਈ ਰੋਕਣ ਵਾਲੇ ਵਿਅਕਤੀ ਨੇ ਗੇਟਮੈਨ ਦੇ ਕਮਰੇ ਵਿੱਚ ਜਾ ਕੇ ਦੇਖਿਆ ਤਾਂ ਉਹ ਸੁੱਤਾ ਪਿਆ ਸੀ। ਜਿਸ ਤੋਂ ਬਾਅਦ ਉਸ ਨੇ ਮੌਕੇ ‘ਤੇ ਉਕਤ ਗੇਟਮੈਨ ਦੀ ਵੀਡੀਓ ਵੀ ਬਣਾਈ। ਰੇਲਵੇ ਅਧਿਕਾਰੀਆਂ ਨੂੰ ਘਟਨਾ ਦੀ ਸੂਚਨਾ ਦੇ ਦਿੱਤੀ ਗਈ ਹੈ। ਰਾਹਗੀਰਾਂ ਅਨੁਸਾਰ ਘਟਨਾ ਸਮੇਂ ਸਾਈਕਲ ਸਵਾਰ ਟ੍ਰੈਕ ‘ਤੇ ਚੜ੍ਹ ਗਿਆ ਸੀ ਪਰ ਸਮੇਂ ਸਿਰ ਉਸ ਦਾ ਬਚਾਅ ਹੋ ਗਿਆ। ਜਿਸ ਤੋਂ ਬਾਅਦ ਗੇਟਮੈਨ ਵੱਲੋਂ ਗੇਟ ਬੰਦ ਕਰ ਦਿੱਤਾ ਗਿਆ।
ਪੀੜਤ ਨੇ ਦੱਸਿਆ- ਟਰੇਨ ਨੇ ਹਾਰਨ ਦਿੱਤੇ ਤਾਂ ਉਸ ਦੀ ਜਾਨ ਬਚ ਗਈ।
ਸਬਜ਼ੀ ਮੰਡੀ ਜਾ ਰਹੇ ਗਣੇਸ਼ ਕੁਮਾਰ ਨੇ ਦੱਸਿਆ ਕਿ ਜਦੋਂ ਉਹ ਫਾਟਕ ਪਾਰ ਕਰਨ ਲੱਗਾ ਤਾਂ ਅਚਾਨਕ ਉਸ ਨੇ ਦੇਖਿਆ ਕਿ ਟਰੇਨ ਆ ਰਹੀ ਹੈ। ਕਿਸੇ ਤਰ੍ਹਾਂ ਗਣੇਸ਼ ਨੇ ਟਰੇਨ ਦਾ ਹਾਰਨ ਸੁਣ ਕੇ ਆਪਣੀ ਜਾਨ ਬਚਾਈ। ਪੀੜਤ ਨੇ ਦੱਸਿਆ ਕਿ ਜਦੋਂ ਗੇਟਮੈਨ ਨਾਲ ਗੱਲ ਕੀਤੀ ਗਈ ਤਾਂ ਉਸ ਨੇ ਕਿਹਾ ਕਿ ਉਸ ਨੂੰ ਲੱਗਦਾ ਸੀ ਕਿ ਗੇਟ ਬੰਦ ਹੈ, ਪਰ ਗੇਟ ਖੁੱਲ੍ਹਾ ਸੀ।
ਸਬਜ਼ੀ ਵਿਕਰੇਤਾ ਰਵੀ ਸ਼ੰਕਰ ਨੇ ਕਿਹਾ ਕਿ ਜੇਕਰ ਸਮੇਂ ਸਿਰ ਦੋਵਾਂ ਪਾਸਿਆਂ ਦੇ ਲੋਕਾਂ ਨੂੰ ਨਾ ਰੋਕਿਆ ਗਿਆ ਹੁੰਦਾ ਤਾਂ ਘਟਨਾ ਹੋਰ ਵੀ ਵੱਡੀ ਹੋ ਸਕਦੀ ਸੀ। ਕਿਉਂਕਿ ਸਵੇਰੇ ਸਬਜ਼ੀ ਮੰਡੀ ਹੋਣ ਕਾਰਨ ਉਕਤ ਫਾਟਕ ’ਤੇ ਕਾਫੀ ਆਵਾਜਾਈ ਰਹਿੰਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਸਾਰੀ ਘਟਨਾ ਦੀ ਵੀਡੀਓ ਬਣਾਈ ਗਈ ਹੈ ਅਤੇ ਇਹ ਵੀਡੀਓ ਰੇਲਵੇ ਵਿਭਾਗ ਨੂੰ ਸੌਂਪ ਦਿੱਤੀ ਗਈ ਹੈ।
