ਖੰਨਾ ‘ਚ ਵੱਡੀ ਘਟਨਾ, ਖਾਣਾ ਬਣਾ ਰਹੇ ਮਜ਼ਦੂਰਾਂ ‘ਤੇ ਗਿਰੀ ਛੱਤ, 8 ਜ਼ਖਮੀ

ਪੁਲਿਸ ਜ਼ਿਲ੍ਹਾ ਖੰਨਾ ਦੇ ਪਿੰਡ ਫੈਜ਼ਗੜ੍ਹ ‘ਚ ਦੇਰ ਸ਼ਾਮ ਖੇਤ ਮਜ਼ਦੂਰਾਂ ‘ਤੇ ਖਾਣਾ ਬਣਾਉਣ ਸਮੇਂ ਮੋਟਰ ਵਾਲੇ ਕਮਰੇ ਦੀ ਛੱਤ ਡਿੱਗ ਗਈ। ਇਸ ਘਟਨਾ ‘ਚ 8 ਮਜ਼ਦੂਰ ਜ਼ਖਮੀ ਹੋ ਗਏ। ਇਨ੍ਹਾਂ ‘ਚੋਂ 5 ਮਜ਼ਦੂਰ ਮਲਬੇ ਹੇਠਾਂ ਦੱਬ ਗਏ। ਘਟਨਾ ਦੀ ਸੂਚਨਾ ਮਿਲਦੇ ਪਿੰਡ ਵਾਸੀਆਂ ਨੇ ਉਨ੍ਹਾਂ ਨੂੰ ਬਾਹਰ ਕੱਢ ਕੇ ਸਿਵਲ ਹਸਪਤਾਲ ਦਾਖਲ ਕਰਵਾਇਆ। ਦੂਜੇ ਪਾਸੇ ਸਥਿਤੀ ਨੂੰ ਭਾਂਪਦਿਆਂ ਐਸ.ਐਮ.ਓ ਡਾ: ਮਨਿੰਦਰ ਸਿੰਘ ਭਸੀਨ ਨੇ ਕਈ ਡਾਕਟਰਾਂ ਨੂੰ ਐਮਰਜੈਂਸੀ ਡਿਊਟੀ ‘ਤੇ ਬੁਲਾਇਆ ਅਤੇ ਜ਼ਖ਼ਮੀਆਂ ਦਾ ਇਲਾਜ ਸ਼ੁਰੂ ਕਰਵਾਇਆ ਗਿਆ।
ਜਾਣਕਾਰੀ ਅਨੁਸਾਰ ਬਿਹਾਰ ਦੇ ਮੋਤੀਹਾਰੀ ਜ਼ਿਲ੍ਹੇ ਦੇ ਰਹਿਣ ਵਾਲੇ ਇਹ ਖੇਤ ਮਜ਼ਦੂਰ ਖੰਨਾ ਦੇ ਪਿੰਡ ਫੈਜ਼ਗੜ੍ਹ ਵਿੱਚ ਇੱਕ ਕਿਸਾਨ ਨਾਲ ਖੇਤੀ ਦਾ ਕੰਮ ਕਰਦੇ ਹਨ ਅਤੇ ਖੇਤਾਂ ਵਿੱਚ ਬਣੇ ਕਮਰਿਆਂ ਵਿੱਚ ਰਹਿੰਦੇ ਹਨ। ਸ਼ੁੱਕਰਵਾਰ ਦੇਰ ਸ਼ਾਮ ਕੰਮ ਖਤਮ ਕਰਨ ਤੋਂ ਬਾਅਦ ਛੇ ਮਜ਼ਦੂਰ ਕਮਰੇ ਦੀ ਛੱਤ ‘ਤੇ ਆਰਾਮ ਕਰਨ ਲੱਗੇ ਅਤੇ ਦੋ ਮਜ਼ਦੂਰ ਕਮਰੇ ਦੇ ਅੰਦਰ ਖਾਣਾ ਬਣਾਉਣ ਲੱਗੇ। ਇਸ ਦੌਰਾਨ ਛੱਤ ਡਿੱਗ ਗਈ। ਹੇਠਾਂ ਬੈਠੇ ਦੋ ਮਜ਼ਦੂਰਾਂ ਸਮੇਤ ਛੱਤ ‘ਤੇ ਆਰਾਮ ਕਰ ਰਹੇ ਸਾਰੇ ਛੇ ਮਜ਼ਦੂਰ ਮਲਬੇ ‘ਚ ਫਸ ਗਏ। ਰੌਲਾ ਸੁਣ ਕੇ ਪਿੰਡ ਦੇ ਲੋਕ ਇਕੱਠੇ ਹੋ ਗਏ ਅਤੇ ਮਜ਼ਦੂਰਾਂ ਨੂੰ ਬਾਹਰ ਕੱਢਿਆ। ਜ਼ਖ਼ਮੀਆਂ ਦੀ ਪਹਿਚਾਣ ਮੁਹੰਮਦ ਕਲੀਮ (45), ਮੁਹੰਮਦ ਕਲਾਮ (50), ਹਰਦੇਵ ਸ਼ਾਹ (60), ਮੁਹੰਮਦ ਕਾਸਿਮ (50), ਸਲਾਹੁਦੀਨ (45), ਮੁਹੰਮਦ ਸ਼ਾਹਿਦ (60), ਮੁਹੰਮਦ ਸਦੀਕ (55), ਮੁਹੰਮਦ ਲਤੀਫ਼ (55) ਵਜੋਂ ਹੋਈ ਹੈ। ਐਂਬੂਲੈਂਸ ਦਾ ਇੰਤਜ਼ਾਰ ਕਰਨ ਤੋਂ ਪਹਿਲਾਂ ਹੀ ਪਿੰਡ ਦੇ ਲੋਕ ਕਾਰ ਵਿੱਚ ਮਜ਼ਦੂਰਾਂ ਨੂੰ ਸਿਵਲ ਹਸਪਤਾਲ ਲੈ ਕੇ ਆਏ। ਜਿੱਥੇ ਮਜ਼ਦੂਰਾਂ ਦਾ ਇਲਾਜ ਚੱਲ ਰਿਹਾ ਹੈ।