ਅਯੁੱਧਿਆ ਦੇ ਰਾਮ ਮੰਦਰ ‘ਚ ਹੁਣ ਸ਼ਰਧਾਲੂ ਰਾਮਲਲਾ ਦੇ ਨਾਲ-ਨਾਲ ਅਨੋਖੀ ਰਾਮਾਇਣ ਦੇ ਵੀ ਦਰਸ਼ਨ ਕਰ ਸਕਣਗੇ। ਇਸ ਅਦੁੱਤੀ ਰਾਮਾਇਣ ਨੂੰ ਪੂਰੀ ਰੀਤੀ-ਰਿਵਾਜਾਂ ਨਾਲ ਪਾਵਨ ਅਸਥਾਨ ਵਿੱਚ ਸਥਾਪਿਤ ਕੀਤਾ ਗਿਆ ਹੈ। ਇਹ ਵਿਸ਼ੇਸ਼ ਰਾਮਾਇਣ ਮੱਧ ਪ੍ਰਦੇਸ਼ ਕੇਡਰ ਦੇ ਸਾਬਕਾ ਆਈਏਐਸ ਸੁਬਰਾਮਨੀਅਮ ਲਕਸ਼ਮੀਨਾਰਾਇਣ ਅਤੇ ਉਨ੍ਹਾਂ ਦੀ ਪਤਨੀ ਸਰਸਵਤੀ ਵੱਲੋਂ ਰਾਮ ਮੰਦਰ ਟਰੱਸਟ ਨੂੰ ਭੇਟ ਕੀਤੀ ਗਈ ਹੈ।
ਇਹ ਰਾਮਾਇਣ ਚੇਨਈ ਦੇ ਮਸ਼ਹੂਰ ਵੁਮੀਦੀ ਬੰਗਾਰੂ ਜਵੈਲਰਜ਼ ਦੁਆਰਾ ਬਣਾਈ ਗਈ ਹੈ। ਪਾਵਨ ਅਸਥਾਨ ਵਿੱਚ, ਇਸ ਨੂੰ ਰਾਮਲਲਾ ਦੀ ਮੂਰਤੀ ਤੋਂ ਸਿਰਫ 15 ਫੁੱਟ ਦੀ ਦੂਰੀ ‘ਤੇ ਇੱਕ ਪੱਥਰ ਦੀ ਚੌਂਕੀ ‘ਤੇ ਰੱਖਿਆ ਗਿਆ ਹੈ। ਇਸ ਦੇ ਸਿਖਰ ‘ਤੇ ਚਾਂਦੀ ਦਾ ਬਣਿਆ ਰਾਮ ਦਾ ਪੱਟਾਭਿਸ਼ੇਕ ਹੈ। ਰਾਮਾਇਣ ਦੀ ਸਥਾਪਨਾ ਸਮੇਂ ਰਾਮ ਮੰਦਰ ਨਿਰਮਾਣ ਦੇ ਇੰਚਾਰਜ ਗੋਪਾਲ ਰਾਓ, ਪੁਜਾਰੀ ਪ੍ਰੇਮਚੰਦ ਤ੍ਰਿਪਾਠੀ ਆਦਿ ਹਾਜ਼ਰ ਸਨ।
ਇਸ ਵਿਸ਼ੇਸ਼ ਪ੍ਰਤੀਕ੍ਰਿਤੀ ਦਾ ਹਰ ਪੰਨਾ 14 ਗੁਣਾ 12 ਇੰਚ ਆਕਾਰ ਦਾ ਹੈ ਅਤੇ ਤਾਂਬੇ ਦਾ ਬਣਿਆ ਹੋਇਆ ਹੈ। ਇਸ ਮਹਾਂਕਾਵਿ ਦਾ ਹਰ ਪੰਨਾ 24 ਕੈਰੇਟ ਸੋਨੇ ਨਾਲ ਲਿਪਿਆ ਹੋਇਆ ਹੈ। ਸੁਨਹਿਰੀ ਪ੍ਰਤੀਕ੍ਰਿਤੀ ਵਿੱਚ ਲਗਭਗ 480-500 ਪੰਨੇ ਹਨ ਅਤੇ ਇਸਨੂੰ 151 ਕਿਲੋ ਤਾਂਬਾ ਅਤੇ 3-4 ਕਿਲੋ ਸੋਨੇ ਦੀ ਵਰਤੋਂ ਕਰਕੇ ਬਣਾਇਆ ਗਿਆ ਹੈ। ਧਾਤ ਦੇ ਬਣੇ ਇਸ ਰਾਮਾਇਣ ਦਾ ਭਾਰ 1.5 ਕੁਇੰਟਲ ਤੋਂ ਵੱਧ ਹੈ।
